Кесә карагы бер хатын-кызның мошенникларга җибәрергә җыенган 3 миллион сум акчасын урлаган
Иркутск шәһәренең полиция хезмәткәрләре автобуста бер хатын-кыздан зур күләмдә акча урлаган 42 яшьлек ир-атны тоткарлаган. Бичара ханым телефон аферистлары һәм гадәти кесә карагы корбанына әйләнеп, бер көн эчендә барлыгы 9 миллион сум акчасын югалткан. Бу хакта «KazanFirst» Россия Эчке эшләр министрлыгының Иркутск өлкәсе буенча Баш идарәсе мәгълүматларына таянып яза.
Бу хәл хокук саклау органнары «хезмәткәре» шалтыратуыннан башланган. Мошенниклар хатын-кызга саклык акчасын урларга маташулары турында хәбәр иткән. Ул, җинаятьчеләргә ышанып, курьерга башта 6 миллион сум тапшырган. Әмма аферистлар моның белән генә туктамыйча, имештер, банкомат аша “имин счет”ка күчерү өчен, счетында калган 3 миллион сумын да алырга мәҗбүр иткән.
Хатын-кыз бер сумка акча белән шыгрым тулы автобуска кереп утырган. Кесә карагы, транспорттагы этешү-төртешүдән файдаланып, тегенең бөтен акчасын урлаган.
Оперативниклар угрыны, тиз генә арада эзенә төшеп, тоткарлаган. Полиция хезмәткәрләре ир-атның фатирын тентегәндә урланган акчаның бер өлешен – 1 миллионнан артыграгын стена эченнән тапкан. Угры калган акчаны инде тотып бетергән булган.
«Аеруча зур күләмдә акча урлау» һәм «Мошенниклык» статьялары буенча җинаять эшләре кузгатылган. Хатын-кызга китерелгән зыянның гомуми күләме 9 миллион сум тәшкил иткән. Полиция хезмәткәрләре стена эченнән табылган 1 миллион сумны законлы хуҗасына кире кайтарган да инде. Тикшерү дәвам итә.
Сүз уңаеннан, хәзерге вакытта Татарстанда «Нәтиҗәле конкурентлыкка сәләтле икътисад» илкүләм проекты гамәлгә ашырыла.
